Bienvenío/a a la versión dixital del Diccionariu de l’Academia de la Llingua Asturiana
L’Academia de la Llingu saca a lluz el Diccionariu de la Llingua Asturiana col que corona una llarga primera estaya en que dio puxu el llabor normativu entamáu coles Normes Ortográfiques, siguíu cola Gramática y acompangáu col inventariu toponímicu Nomes de conceyos, parroquies, pueblos y llugares del Principáu d’Asturies. En venti años de xera l’Academia llogró non tolos cumales que puen algamase na historia d’una llingua sinón poner el ramu onde más facía falta entainar. Sábese qu’entá ye muncho lo que tien que se facer pero agora yá pue encarase’l trabayu ensin l’afoguín de la priesa, diendo adulces y persabiendo cómo se fai nuna andecha.
Pa que’l Diccionariu de la Llingua Asturiana pudiera iguase hebo trabayar llargu tiempu la xunta de normalización académica que conto non sólo con tres miebros de númberu nella inxertos sinón con otres munches persones más que sofitaron en dalguna de les faces de la ellaboración. De mou especial tevo esta obra la dedicación d’otres, becaes el efeutu, modelu de bon facer y d’especialización. Esti Diccionariu fíxose posible tamién gracie a que se punxo xenerosamente nes manes de l’Academia la mayura de materiales arrecoyíos pal Diccionario Etimológico de la Llingua Astuiana (DELLA) que, pel so llau, axunta críticamente los datos de les monografíes dialeutales d’Asturies, y en parte tamién de les tierres del sur del nuesu dominiu llingüísticu, asina como otres debíos a fontes estremaes que van dende vocabularios a informaciones puntuales apurríes pola competencia llingüística d’académicos y amigos que, bonablemente, quixeron collaborar nesti gran monumentu del idioma asturianu.